Бакалаўрская праграма “Гісторыя Беларусі і культурная антрапалогія” была распрацавана з улікам патрабаванняў, якія прад'яўляюцца да выпускнікоў гістарычных факультэтаў універсітэтаў Еўропы. Яна дае грунтоўныя веды па гісторыі Беларусі і Еўропы, а таксама ў галіне сацыяльнай, культурнай і гістарычнай антрапалогіі і іншых гуманітарных дысцыплін.
У праграме заняты вядомыя беларускія гісторыкі, якія паспяхова спалучаюць выкладанне і навуковую дзейнасць. Гэта стварае рэдкую магчымасць вывучаць гісторыю ў даследчыкаў, якія яе пішуць. Акрамя таго, студэнты знаёмяцца з такім варыянтам гісторыі, дзе ў цэнтры ўвагі знаходзіцца ЧАЛАВЕК з яго поспехамі і расчараваннямі, радасцямі і нягодамі.
Адпаведна, нараўне з традыцыйнымі курсамі (напр., “Гісторыя Беларусі ад старажытнасці да канца 18 ст.” або “Палітычная гісторыя Еўропы”) студэнты вывучаюць прадметы, якія адсутнічаюць у вучэбных праграмах большасці універсітэтаў Беларусі. У прыватнасці, гэта “Гісторыя штодзённасці”, “Гісторыя Цэнтральна-Усходняй Еўропы”, “Гендэрная гісторыя Беларусі”, “Метадалогія і метады гістарычнага даследавання”, “Культурная і сацыяльная антрапалогія”, “Уводзіны ў біблістыку” ды інш.
Археалагічная і этнаграфічная практыкі дазваляюць маладым людзям непасрэдна дакрануцца да старажытнай гісторыі і адчуць усю прыгажосць народнай культуры. Для многіх яны становяцца своеасаблівым “адкрыццём” Беларусі і Літвы.
Студэнтам прадстаўлена рэдкая магчымасць жыць і вывучаць гісторыю ў горадзе, вуліцы якога памятаюць вялікага князя Гедыміна і першадрукара Францыска Скарыну, паэта Адама Міцкевіча і паўстанца Кастуся Каліноўскага, супрацоўнікаў рэдакцыі “Нашай Нівы” і навучэнцаў знакамітай віленскай беларускай гімназіі.
У Вільні яшчэ жывуць традыцыі шматнацыянальнага Вялікага княства Літоўскага, дзе пераважаў дух нацыянальнай і рэлігійнай талерантнасці. Вільня была горадам, у якім актыўна развівалася беларуская культура. Яна і сёння жыве тут. Студэнты маюць магчымасць сустракацца з вядомымі беларускімі гісторыкамі, пісьменнікамі і паэтамі, журналістамі і палітыкамі.
Узімку 2007 г. ва універсітэце пачаў працаваць навуковы гістарычны гурток, удзел у якім можа стаць добрай школай будучага даследчыка Цэнтральна-Усходняй Еўропы. Адзін з прыярытэтаў гуртка – вывучэнне “беларускай Вільні”, у тым ліку пошук магілы Каліноўскага, пошук рэдкіх гістарычных дакументаў, экспедыцыі па вуснай гісторыі (oral history).
Такім чынам, праграма “Гісторыя Беларусі і культурная антрапалогія” – гэта
Выпускнікі праграмы змогуць працаваць навуковымі супрацоўнікамі музеяў, экскурсаводамі, выкладчыкамі гістарычных дысцыплін, выступаць у якасці экспертаў па праблемах гістарычнай спадчыны, праводзіць самастойныя даследаванні ў вобласці гістарычнай навукі або працягнуць навучанне ў магістратуры.
Праграма прапануецца як у дзённым, так і ў завочнымфармаце.
Дзённае навучанне па дадзенай праграме ў 2006-2010 г. здзяйсняецца пры фінансавай падтрымцы Еўрапейскага Саюзу і Рады міністраў Паўночных краін.
