Эксперыментальны студэнцкі тэатр ”EST”

Тэатр "EST" існуе з вясны 2006 года.

Гісторыя

Стаўшы першакурснікамі ЕГУ, мы апынуліся адзінымі студэнтамі гэтага універсітэта, бо ён пераехаў з Беларусі ў Літву, а мы былі першым наборам. Напэўна, можаце сабе ўявіць, што адбываецца з установай, калі рашэнне адрадзіцца і пачаць працаваць толькі што ўступіла ў сілу – гэта значыць усё сырое, усё толькі наладжваецца, толькі пачынае выбудоўвацца ў нейкую структуру. Студэнты апынуліся ў сітуацыі, калі яны не проста атрымлівалі веды, а з'яўляліся такім жа звяном, што забяспечвае дзейнасць універсітэта, як і адміністрацыя.

Гэта было падобна на тое, быццам нам далі велізарны кавалак гліны і сказалі: "Усё тое, што вы злепіце сваімі рукамі - то ў вас і будзе". Гэтым мы і займаліся. То фотасесіі ладзілі, то малявалі, фільмы здымалі, вядома, дурэлі часам (з чаго потым атрымліваліся цікавыя эцюды, перформансы), але ўсё гэта заставалася ў сценах інтэрната.

Увесну рыхтавалася свята з нагоды заканчэння першага навучальнага года ва універсітэце. Менавіта там пры дапамозе выкладчыцы Надзеі Гусакоўскай мы і вырашылі рэалізаваць для гледачоў усё, што назапасілася. Зладзілі тэатральную вечарыну з перформансамі і пастаноўкамі. Гэта была першая праца тэатральнай студыі.

Спецыфіка універсітэта, вядома, адбіваецца на форме працы студыі. На пазаакадэмічную дзейнасць уплывае вельмі гнуткі, нефіксаваны расклад. Выкладчыкі прыяджаюць і з'яджаюць, таму першапачаткова пра сталага рэжысёра і выкладчыка не магло быць і гаворкі. Студыю паставілі на праектную дзейнасць: запрашалі розных выкладчыкаў і працавалі з імі.

Што было ў EST:

• Сумесны праект са Свабодным тэатрам, вынікам якога стаў спектакль InBetween.
• Майстар-класы з Аленай Плютавай, дзе мы даведаліся пра Кантактную Імправізацыю (Contact Improvisation);
• Трэнінгі Вячаслава Іназемцава, дзе мы акунуліся ў Бута (Butoh). Трошку пра тое, што было;
• Праца з Міхасём Камінскім;
• Таксама сталыя сустрэчы з Юліяй Мельнік (танчыць КІ, перформер).

Усе трэнінгі завяршаліся перформансамі, выступамі як ва універсітэце, так і па-за яго межамі. Два гады запар студыйцы ўдзельнічаюць у міні-фэстах па кантактнай імправізацыі ў Вільнюсе. А ўлетку 2009 студыя "EST" сумесна з літоўскай групай кантактнікаў займалася арганізацыяй міжнароднага "Фэсту КІ і перформансаў". Фота з міні-фэсту.

Што будзе ў EST:

1. Заняткі з Галінай Губанавай. Праца з ёй - гэта сталыя рэпетыцыі з наступным выхадам да гледачоў, а таксама магчымасцю ўдзельнічаць на розных тэатральных фэстах і падзеях, звязаных з тэатральнай дзейнасцю і відовішчнымі мастацтвамі.
2. Штомесяц мяркуецца праводзіць майстар-класы з заезджымі выкладчыкамі: Міхаіл Камінскі (Беларусь), Iwona Olszowska (Польшча), Paolo Cingolani (Італія); магчымыя некаторыя змены ў складзе заезджых выкладчыкаў;
3. Сумесная праца з літоўскай групай па кантактнай імправізацыі (кіраўнікі Юлія Мельнік, Тадас Ляончыкас): перформансы, майстар-класы;
4. З 25 мая - 4 чэрвеня 2010 праца з Трансверсальным тэатрам Браяна Рэйналдса: майстар-класы па пластыцы, гуку, перформансу, драматургіі; лекцыі; у якасці фінальнага праекту - маленькі спектакль/перформанс са студэнтамі; плануюцца крэдыты за курс. Па прыездзе ў Вільнюс тэатрам будзе выкананы спектакль "The Green Knight";
5. 5. Пачатак жніўня - працяг праекту міжнароднага фэсту КІ і перформансаў ("Contact Improvisation and Performance Festival")

Спасылкі:

Пра праект на сайце ЕГУ: http://www.ehu.lt/students_life/projects/est/
На форуме ЕГУ: http://ehunity.org/forum/viewforum.php?f=20&sid=ca256d86c78c2526877a613f4760f1af
У ЖЖ: http://community.livejournal.com/ehu_theatre/
Відэаролік аб "EST": http://www.youtube.com/watch?v=YQ03jP-eIHo&feature=player_embedded