Цэнтр міжнароднай адукацыі і кар'еры (International Education and Career Advising Center) быў утвораны ў сакавіку 2009 года пры супрацоўніцтве Еўрапейскага гуманітарнага ўніверсітэта і
Амерыканскіх саветаў па міжнароднай адукацыі (
American Councils for International Education, ACTR/ACCELS). Адна з яго прыярытэтных задач – садзейнічанне студэнтам універсітэта ў пошуку дадатковых адукацыйных і прафесійных магчымасцяў у краінах Еўропы і ЗША. Падвышэнне прафесійнай кваліфікацыі для студэнтаў універсітэта пераважна арыентаванае на паслядыпломную адукацыю, навучанне ў магістратуры і дактарантуры.
Партнёры цэнтра - шэраг вядучых адукацыйных установаў Еўропы. Такія партнёрскія сувязі дазваляюць студэнтам-выпускнікам ЕГУ прэтэндаваць на значную фінансавую дапамогу пры працягу сваёй адукацыі. У шэрагу выпадкаў усе выдаткі цалкам кампенсуюцца прымаючым бокам, але пры ўмове паспяховага праходжання конкурснага адбору. Высокакваліфікаваныя супрацоўнікі цэнтра аказваюць прафесійную кансультацыйную дапамогу на ўсіх этапах конкурснага адбору, уключна з арыентацыяй да ад'езду на навучанне альбо ў выпадках індывідуальнага паступлення ў ВНУ ЗША і Еўропы.
Цэнтр валодае найноўшай спецыялізаванай літаратурай, якая дапамагае студэнтам самастойна рыхтавацца да ўступных іспытаў у замежныя ВНУ (стандартызаваных тэстаў TOEFL, GRE, GMAT, LSAT), засвойваць эфектыўныя тэхналогіі падрыхтоўкі пакета дакументаў для паступлення (запаўненне анкеты, рэкамендацыі, эсэ, curriculum vitae), праводзіць пошук адукацыйных установаў, грантаў і стыпендый. Бібліятэка цэнтра мае фонды, якія дазваляюць штогод абнаўляць і папаўняць літаратурныя крыніцы.
Наведвальнікі цэнтра маюць магчымасць карыстацца доступам у Інтэрнэт для пошуку адукацыйных магчымасцяў за мяжой, атрымліваць навіны цэнтра праз рэгулярную паштовую рассылку, як, напрыклад, штотыднёвыя інфармацыйныя блокі пра адукацыйныя магчымасці ў ЗША. Супрацоўнікі цэнтра штогод праходзяць курсы падвышэння кваліфікацыі ў партнёрскіх арганізацыях ЗША і Еўропы, што дазваляе больш прафесійна рэалізоўваць сваю місію.
